മൃഗശാല തുറന്നത് കൗതുകങ്ങളിലേക്ക്. ടിക്കറ്റ് കൗണ്ടറിനു മുന്നിലെത്തിയാൽ ചോദ്യം കടലാസുണ്ടോ? എങ്കിൽ കയറാം.ഇതേത് ഈ ‘ കടലാസുപുലി’ എന്നു സംശയിക്കേണ്ട. വാക്സിനേഷന്റെ കടലാസാണ് മൃഗശാലയിൽ ഇപ്പോൾ പുലി. ആ പുലി കൂടെയുണ്ടെങ്കിൽ അകത്തുകയറി ഒറിജിനൽ പുലിയെ കാണാം.
വാക്സീനെടുത്ത കടലാസ് കാണിച്ച് അകത്തു കയറിയാൽ കാഴ്ച നേരെ തിരിച്ചായി. മുൻപ് കാണികൾ മൃഗങ്ങളെയാണു കൗതുകത്തോടെ നോക്കിയിരുന്നത്. ഇപ്പോൾ മൃഗങ്ങൾ കാണികളെ കൗതുകത്തോടെ നോക്കുന്നു. ‘ എവിടാരുന്നു ഇതുവരെ?’ എന്ന ഭാവത്തിൽ.തെക്കേ അമേരിക്കൻ ഒട്ടപ്പക്ഷി റിയയേയാണ് ഏകദേശം അടുത്തു കാണാവുന്നത്. ബാക്കിയൊക്കെ പുതിയ ബാരിക്കേഡിന്റെ സാമൂഹിക അകലത്തിലാണ്. മൃഗശാല തുറന്നത് അറിയാത്തതുപോലെ സിംഹം കിടന്ന് കൂർക്കംവലിച്ചുറക്കം.കടുവയുടെ സാമൂഹിക അകലം കുറച്ചു കൂടിപ്പോയി.
അങ്ങുദൂരെ ഒരു പൂച്ചക്കുട്ടിയുടെ വലുപ്പത്തിൽ അതാ ഇരിക്കുന്നു. ഭക്ഷണത്തി‌നായി 2 മണിക്ക് അടുത്തുള്ള കൂട്ടിലേക്കു കൊണ്ടുവരും. പുള്ളിപ്പുലി നഖം തുടച്ചു വ‌ൃത്തിയാക്കുന്നു. കാര്യമായെന്തോ തട്ടിയിട്ടുണ്ട്. കാണികളെ കണ്ട സന്തോഷത്തിലാവാം മയിലുകൾ പീലിവരിച്ചു.പുതിയ ചില നടപ്പാതകൾ പണിതത് സൗകര്യമായി.
