അതിജീവനത്തിന്റെ ‘അന്യായ’ പോരാട്ടം – സ്‌ക്വിഡ് ഗെയിം

കളികൾ സംഘടിപ്പിക്കുന്നത് വിദൂരമായ ഒരു ദ്വീപിലാണ്. അവിടേയ്ക്ക് മത്സരാർത്ഥികളെ കൊണ്ടുപോവുന്നത് മയക്കിക്കിടത്തിയും. മത്സരത്തിലെ നിയമങ്ങൾ കണിശമായി പാലിച്ചേ മതിയാവൂ. പക്ഷേ, ഇടയ്ക്കുവെച്ച് ഒരാൾ നിയമം ലംഘിക്കുന്നത് അവശേഷിക്കുന്ന മത്സരാർത്ഥികളെ പരിഭ്രാന്തിയിലാഴ്ത്തുന്നു. സംഘത്തിലെ ഒരു ഗുണ്ട കൂടുതൽ ഭക്ഷണത്തിനുവേണ്ടി സഹകളിക്കാരനെ കൊലപ്പെടുത്തുന്നു. സംഘാടകരാകട്ടെ, അതിനെ നോർമലൈസ് ചെയ്യുന്നു. കളിക്കിടയിൽ പറ്റിയ അപകടം മാത്രം! ആളെണ്ണം കുറയുന്നതനുസരിച്ച് സമ്മാനത്തുക കൂടുന്നത് ജീവൻ ബാക്കിയുള്ള ഭൂരിഭാഗത്തെയും സന്തുഷ്ടരാക്കുന്നു. കൊല്ലപ്പെടുന്നതനുസരിച്ച് സമ്മാനത്തുക കൂടും. സംഘത്തിലെ മര്യാദക്കാർക്ക് ഉറക്കമില്ലാതാവുന്നു. അവർ ഇരുട്ടത്ത് കൊല്ലപ്പെടാതിരിക്കാനായിചുറ്റും ബാരിക്കേഡുകൾ സ്ഥാപിച്ച് മാറിമാറി ഉറക്കമൊഴിയുന്നു. ഇതിനിടെ സങ് കാണുന്ന സ്വപ്നം മുതലാളിത്തലോകത്തിൻറെ പളപളപ്പുള്ള മുഖത്തിനടിയിലെ ദംഷ്ട്രകൾ കാട്ടിത്തരുന്നു. സമരം ചെയ്യുന്ന കാർ ഫാക്ടറിത്തൊഴിലാളികളെ വളഞ്ഞിട്ടാക്രമിക്കുന്ന പ്രത്യേകസേനാ വിഭാഗം. കൊറിയയിൽ സമാനമായ ഒരു സംഭവമുണ്ടായിരുന്നു 2009-ൽ. നമ്മുടെ വിജയ് മല്ല്യയെപ്പോലെ പാപ്പരാണെന്ന് പ്രഖ്യാപിച്ച് സാങ് യോങ് മോട്ടോഴ്സ് 2,646 ജീവനക്കാരെ പിരിച്ചുവിട്ടു. പോലീസും പട്ടാളവും ചേർന്ന് സമരക്കാരെ നേരിട്ടു. ദീർഘകാലസമരം കൊണ്ട് കാര്യമായ ഗുണമുണ്ടായില്ല. പട്ടിണിയും ദാരിദ്ര്യവും സഹിക്കാനാവാതെ നിരവധിപ്പേർ ആത്മഹത്യ ചെയ്തു. ഇത്തരം സൂചനകൾ കഥയ്ക്ക് ഞെട്ടിക്കുന്ന പുതിയൊരു മാനം നൽകുന്നു.