അപൂർവ്വമായി മാത്രം എത്തുന്ന പച്ച വാൽ നക്ഷത്രം (സി/2022e3) ബുധാഴ്ച (ഫെബ്രുവരി 1) ഭൂമിയോട് ഏറ്റവും അടുത്തെത്തും. ലോകത്ത് എല്ലായിടത്ത് നിന്നും ഈ നക്ഷത്രത്തെ വീക്ഷിക്കാവുന്നതാണ്. ലോകത്ത് എല്ലായിടുത്തു നിന്നും ഈ അപൂർവ്വ കാഴ്ച കാണാൻ കഴിയുമെന്നും ജ്യോതിശാസ്ത്രജ്ഞർ പറയുന്നു. ഇന്ത്യയിലെ മിക്കവാറും സംസ്ഥാനങ്ങളിലും ഇത് ദൃശ്യമാകും. പച്ച നിറത്തോടു കൂടിയാണ് ഈ വാൽ നക്ഷത്രത്തെ കാണാൻ സാധിക്കുക. വാൽമാക്രിയുടേത് പോലുള്ള വാലും ഈ നക്ഷത്രത്തിന്റെ സവിശേഷതയാണ്.
2023 ജനുവരിയോടെ സൂര്യന് ചുറ്റുമുള്ള ഭ്രമണം പൂർത്തിയാക്കിയ ശേഷമാണ് വാൽനക്ഷത്രം ഭൂമിയ്ക്ക് മുകളിലുള്ള ആകാശത്തിലേക്ക് കടക്കുന്നത്. സൂര്യപ്രകാശത്തിന്റെ സാന്നിദ്ധ്യവും നക്ഷത്രത്തിനുള്ളിലെ കാർബൺ തൻമാത്രകളുടെ സംയോജനവും കൊണ്ടാണ് ഇവയ്ക്ക് പച്ച കലർന്ന നിറം ലഭിച്ചതെന്നാണ് ശാസ്ത്രലോകത്തിന്റെ കണ്ടെത്തൽ.
ഭൂമിയുടെ ഉപരിതലത്തിൽ നിന്ന് 42 മില്യൺ കിലോമീറ്റർ അകലെയാണ് ഈ നക്ഷത്രം കാണപ്പെടുന്നത്. 50000 വർഷത്തിന് മുമ്പാണ് ഈ വാൽ നക്ഷത്രത്തെ അവസാനമായി കണ്ടത്. അന്ന് ഭൂമിയിൽ വസിച്ചിരുന്നത് നിയാണ്ടർതാൽ മനുഷ്യരായിരുന്നു.
തെളിഞ്ഞതും ഇരുണ്ട നിറത്തിലുമുള്ള ആകാശത്തിൽ മാത്രമെ ഈ വാൽ നക്ഷത്രത്തെ കാണാൻ സാധിക്കയുള്ളു. അത്രയധികം പ്രകാശം വഹിക്കുന്നവയല്ല ഈ നക്ഷത്രം. അതിനാൽ ഇവയെ കാണാൻ ബൈനോക്കുലർ ഉപയോഗിക്കാവുന്നതാണ്. നഗ്ന നേത്രങ്ങൾ കൊണ്ട് കാണാൻ കഴിയുന്നവയല്ല ഈ വാൽനക്ഷത്രം. രാത്രി 9.30 ന് ശേഷമാണ് ഇവയെ കാണാൻ സാധിക്കുക. ഇന്ത്യയിൽ പശ്ചിമ ബംഗാൾ, ഒഡിഷ, ലഡാക്ക്, വടക്ക് കിഴക്കൻ സംസ്ഥാനങ്ങൾ എന്നിവിടങ്ങളിൽ നിന്ന് ഈ അപൂർവ്വ ആകാശകാഴ്ച വീക്ഷിക്കാൻ സാധിക്കുമെന്നാണ് വിവരം.
